Footer

Poet laureate, pimmusay

STA. MARIA, Ilocos Sur – Pimmusay itay Hulio 5 ti poet laureate ti Kailokuan ken nagdiputado ken gobernador iti probinsia ti Ilocos Sur.

Pimmusay ni Dr. Godofredo Sebastian Reyes, mabigbig a mannaniw ken premiado a mannurat, mangngagas, beterano ti maikadua a gubat ti sangalubongan, pintor ken mannursuro ken maraem a politiko iti probinsia iti tawenna a 90.

Nakamassayag ti bangkayna iti Divine Mercy Chapel iti Suso Beach ditoy nga ili, lugar a nakaisayangkatan kadagiti seminar-workshop ti Gunglo dagiti Mannurat nga Ilokano-Filipinas.

Daydi Dr. Godo (birngasna) ti nabutosan a kaubingan a mayor daytoy nga ili ken nagtakem iti nadumaduma a puesto ti gobierno kas dipu-tado iti maikadua a distrito ken kas gobernador.

Malaksid nabalangatan a poet laureate ti Kailokuan gapu iti kinamannaniwna ken otor iti sumagmamano a libro, napadayawan pay a Bukaneg awardee, kangatuan a pammadayaw a maited iti maysa a mannurat nga Ilokano.

Kinuna ni Dr. Dedicacion Reyes a maitabon ti kasimpungalanna inton Hulio 18.#