Pondo ti RA 7171, mapagduaduaan a mayimplementar

SINAIT, Ilocos Sur – Kinuna ti maysa a konsehal ditoy a mapagduaduaan a maikamakam a mayimplimentar ti pondo manipud iti bingay daytoy nga ili iti RA 7171.

Kinuna ni ABC President Glen Guzman a saan pay a mayimplimentar ti pondo manipud iti RA 7171 gapu iti saan latta a panagkikinnaawatan ti mayor ken ti sangguniang bayan ditoy mainaig iti prioridad a barangay a pakayimplimentaran iti pondo.

Maipalagip a 30 a barangay ditoy nga ili ti inikkan ni Mayor Marlon Ines iti prioridad a pakayimplimentaran ti umuna a release ti bingay daytoy a munisipalidad manipud iti excise tax ti tabako kas sagudayen ti RA 7171 nga agdagup iti P5.8 milion ngem saan nga inanamongan ti sangguniang bayan agsipud ta awan ti bingay ti 14 a barangay a kaadduanna ti kangrunaan nga agmulmula iti tabako..

Insingasing ni Ines a pagbibingayan dagiti 14 a barangay ti P1.5 milion a maikadua a release ti bingay ti munisipalidad iti RA 7171 ngem saan nga immanamong dagiti maseknan a barangay captains.

Iti maysa nga emerhensia a miting nga inangay dagiti barangay captains, napagtitinonganda a pagtiponen ti umuna ken maikadua a release ti pondo ti RA 7171 tapno equal sharing kadagiti amin a barangay.

Aganay a P166,000 ti bingay ti tunggal barangay iti babaen ti equal sharing.

Kinuna ni Guzman a no saan latta ng agkasurotan ti mayor ken ti sangguniang bayan, pagduaduaan a mayimplimentar ti pondo ket posible nga abutan ti election ban.#