STA. LUCIA, Ilocos Sur – Positibo a Porcine Reproductive Respiratory Syndrome (PRRS) virus ti nangdalapus kadagiti taraken a baboy ditoy a puon ti ipapatayda.
Daytoy ti naammuan ti DZTP manipud ken ni Dr. Rolando Maranion, city veterinarian, a resulta ti sample nga innala ti beterinario ti probinsia manipud iti naguneg ti maysa a natay a baboy a naipaamiris iti laboratorio no ania a talaga ti nakatayanda.
Kanaig daytoy, nagtignay dagiti agtuturay ditoy tapno malapdan ti panagwaras pay daytoy a sakit a nakatayanen ti nasurok a 100 ken nakaapektaran iti 130 a baboy ditoy nga ili.
Segun iti maysa nga opisial, awanen ti mapalubosan a mairuar wenno mailako a sibibiag wenno naparti a baboy ken saanen a maipalubos ti pannakaiserrek dagiti lako a baboy ditoy nga ili.
Dua ti kangrunaan a suspetsa dagiti otoridad a nagtaudan ti PRRS: dagiti nagatang a burias a posible nga adda sakitna manipud iti Pangasinan ken ti pannakalayus ti slaughterhouse iti napalabas a panagbagyona a dimmanon dagiti rugit kadagiti naapektaran a barangay.
Uppat a barangay ditoy ti nagpatay dagiti tarakenda a baboy a pakairamanan ti Barangay Angkileng, Buliclic, Pila East ken Conconig Este.
Iti report a dimmanon iti DZTP ken daytoy a pagiwar-nak, agdagupen iti nasurok a 50 dagiti baboy a natay a nag-sakit iti PRRS iti Barangay Angkileng.
Nasurok a 35 a burias ken 2 a takong ti natay a taraken ni Manang Luciana Fernandez a mapattapatta nga agpateg iti nasurok a P100,000.
Gapu iti panagpatay dagiti baboy ditoy, naapektaran dagiti meat vendors gapu ta awanen ti aggatang iti karne ti baboy gapu iti amakda a maiyakar ti sakit iti tao.
Maysa nga aglaklako ti nagkuna a kasapulanda ti tulong manipud kadagiti agtuturay ditoy agsipud iti dakkel a pukawda iti kaawanen dagiti aggatang iti lakoda.
Maysa a virus ti PRRS a mang-atake iti immune system dagiti baboy nga agtungpal iti kalakada a kapten ti inpeksion ken sakit.
Kangrunaan a sintomas dagiti nagsakit a baboy ti panagngesngesda ken saanda a pannakatakder.
Ngem kinuna ti maysa a beterinario a saan a maiyakar daytoy a sakit kadagiti tattao.
Imballakad daytoy a lutuen a nalaing ti karne ti baboy tapno masigurado a matay ti virus a kargana.#