Footer

Presio ti karne ti baboy, ngimmato iti Narvacan, Sinait

NARVACAN, Ilocos Sur – Ngimmato manen ti presio ti karne ti baboy ditoy iti sanguanan ti mapapati a panagkurkurang ti suplay ti maparti a baboy ditoy nga ili.
Segun iti maysa nga aglaklako iti karne ditoy, naaprobaranen ti baro a presio ti karne iti P180 kada kilo manipud iti P170 kada kilo.
Kinunana pay a maipuon daytoy iti ingangato ti paggatangda iti liveweight iti P90-95 iti kada kilo manipud iti P85-90 kada kilo iti kallabes.
Simmurot pay a ngimmato ti presio dagiti sumaganad: tultulang – P120 manipud iti P110; bagnet – P370 manipud iti P360; longganisa – P100 kada dosena manipud iti P90 kada dosena.
Naammuan ti Tawid News a gapu iti panagkurang ti suplay a baboy ditoy nga ili, agsawaren nga aggatang dagiti aglaklako iti karne ti baboy kadagiti kabangibangna nga ili ken probinsia.
Kabayatanna, segun iti presidente ti meat vendors association iti Sinait, natuonan iti P10 kada kilo ti presio ti karne ti baboy a mailako iti tiendaan publiko ti nasao nga ili.
Manipud iti P160 kada kilo, nagbalinen ti presio ti karne ti baboy a mailako iti tiendaan publiko ti Sinait iti P170 kada kilo.
Kinakurang ti suplay ti maparti a baboy ti rason dagiti meat vendors ti nasao nga ili no apay nga impangatoda ti presio ti karne ti baboy.
Mailaklako metten ti karne ti baboy iti tiendaan ti siudad ti Vigan iti P170 kada kilo.
Sakbayna, kiniddaw dagiti meat vendors iti nasao a siudad a temporario a a maipangato ti presio ti lakoda a karne ti baboy gapu iti panagkurkurang ti suplay ti baboy ken gapu iti kinangina dagiti pagpakanda kadagitoy.
Inkari dagiti meat vendors nga isublida ti presio ti karne ti baboy iti dati a presio iti kanito nga ag-stabilize ti suplay ti baboy iti nasao a lokalidad.#