Problema iti sistema ti GSIS, nasolbaren

VIGAN CITY – Kinuna ti maysa a turayen ti sistema ti seguro ti gobierno a natalged daytoy ket saan koma nga agamak dagiti miembro nga awanen ti pondo.

Kinuna ni Government Security Insurance System (GSIS) Vice President Eduardo Fernandez bayat ti miting ti League of Mayors of the Philippines, Ilocos Sur Chapter idi Hulio 31 a rimsua dagiti problema maigapu iti pannakapasayaat ti sistema manipud iti database iti oracle based a manamnama a malpas sakbay naga aggibus ti tawen

Kanaig daytoy, nagpadispensar ni Fernandez kadagiti amin a miembro ti GSIS iti nabayag a pannakaproseso dagiti loan ken pensionda maigapu iti problema iti sistema ti ahensia a nangrugi idi Marso 30.

Segun ken ni Fernandez, dagus nga innalada ti serbisio dagiti consultants manipud iti sabali a pagilian tapno masolbar ti parikut ken agtuloy ti serbisio nga ipaayda kadagiti miembro.

“Maiproseso itan amin a serbisio ti ahensia kangrunaanna ti loan ken dagiti pension a medio nataktak gapu iti nagbalin a parikut. Kadagiti taga-Ilocos Sur, mabalinyo ti mapan iti Candon ken Vigan Satellite Office wenno iti Laoag Office tapno ag-over the counterkayo,” kinuna ni Fernandez.

Kinuna ti opisial a saan koma nga agpanunot dagiti miembro nga awanen ti pondo ti ahensia a makaigapu iti napasamak a problema ta lalo pay a dimmakkel ti pondo ti GSIS iti P500 bilion idi 2008 manipud iti P200 bilion idi 2001.

“No idi ket umabot laengen agingga iti 2028 ti pondo, ita ket makaanayen agingga iti 2055 no ti pondo iri 2008 ti pagibasaran,” impatalged ti VP.

Impakaammo pay ni Fernandez a mabalinen dagiti miembro ti mangipila iti housing loan nag addaan iti 8% nga interes ken bayadanda iti uneg ti 30 a tawen. Agdepende ti kadakkkel ti mabalin nga utangen iti payment capacity ti maysa a miembro.

Innayon ti opisial nga adda metten tie-up iti nagbaetan ti GSIS ken ti pharmaceutical company a Pfizer ken ti Science and Technology Institute (STI) ket iti panangipakita ti miembro iti e-cardna, maikkan daytoy iti agingga iti 50% a diskuento kadagiti amin nga agas nga aramid ti Pfizer ken agingga iti 20% a diskuento iti matrikula iti STI dagiti kakabagian ti miembro agingga iti 6th degree of sanguinity.#