Footer

Salesman, babai, biktima ti hold-ap

STA. MARIA, Ilocos Sur – Hinold-ap ti dua a lalaki ti maysa a balasang iti asideg ti sementerio ditoy ket binagsolda idi nagkitakit a mangited iti bagna a naglaon iti kuarta.

Nagsagrap ni Michelle Basconcilio, 24, residente iti Burgos, Ilocos Sur iti sugat iti akinkannawan nga abagana ket intaray dagiti immarayat nga agindeg iti asideg ti sementerio iti maysa nga ospital ditoy.

Segun iti inisial nga inbestigasion dagiti polis ditoy, aggawiden ti biktima iti Burgos a nakalugan iti motorsiklona idi nagbalangan ti dua a lalaki iti dalanna iti asideg ti kamposanto sada inwaragawag ti “hold-ap”.

Mapapati a nakiranget ti biktima idi alaen dagiti hold-aper ti bagna a puon ti nangbagsolan ti maysa kenkuana.

Nagnagna a pimmanaw dagiti suspetsa kalpasan ti hold-ap iti saan nga ammo a direksion.

Sakbayna, kagapgapu ti biktima a nangiruar iti P30,000 iti maysa a bangko iti Candon City.

Di pay ammo ti kinaasino dagiti suspetsa ken no kasano nga ammoda nga adda dakkel a kantidad nga ikut ti biktima.

Kabayatanna, hinold-ap dagiti armado a lallaki ti delivery van ti maysa a pasdek-negosio iti malem ti Abril 16 iti panagdaliasatna iti national highway a sakup ti Barangay Magsaysay District, Santa, Ilocos Sur.

Nagpulong da Meliton Anyog, drayber ti JTC L-300 van, residente iti Barangay Paratong, Vigan City ken ni Ariel Maligbas, 42, naasawaan, salesman ti JTC, a hinold-ap ida dagiti tallo a lallaki bayat ti panagdaliasat ti luganda iti nadakamat a barangay iti alas 5:15 ti malem ti Abril 16.

Segun iti report, nagbalangan dagiti nagtagiarmas a suspetsa iti dalan sada indeklara ti hold-ap.

Mapapati a nagpaputok dagiti suspetsa idi agkitakit dagiti biktima a mangited iti koleksionda nga agdagup iti nasurok P80,000, tseke ken maysa a selpon.

Naglibas dagiti suspetsa a nakalugan iti gray a van.

Nakarekobre dagiti inbestigador iti kapsula a nagtaud iti M-16 armalite ken 9MM.#