Seguridad dagiti siklista, impatalged ti PPO Ilocos Sur

BANTAY, Ilocos Sur – Nakasaganan ti kapolisan ditoy a mangipaay iti seguridad kadagiti makipartisipar iti Padyak Pinoy 2009 Tour of Luzon, Philippine Individual Challenge a maangay ditoy probinsia inton Mayo 12-14.

Daytoy ti impatalged ti provincial police office nga idadauluan ni Police Senior Supt. Virgilio Fabros idinto nga imbilinna kadagiti hepe ti polis nangruna iti national highway a pagdalanan dagiti siklista iti panangipaayda iti naan-anay a seguridad, itutulongda iti nasayaat a panagannayas ti trapiko ken pannakakontrol dagiti agbuya ken police visibility tapno malapdan dagiti saan a nasayaat a mapagteng kabayatan ti pannakaangay ti nasao a torneo ditoy probinsia.

Sakbayna, kiniddaw ni Gov. Deogracias Victor Savellano ken ni Fabros ti panangipaayna iti seguridad iti pannakaangay ti nasao a torneo iti Ilocos Sur.

Iti tallo nga aldaw a torneo, agsinnublat ti kuerpo ti polis ti Tagudin ken Vigan City a mangipaay iti eskort kadagiti siklista iti panagdaliasatda iti kalsada nasional a sakup ti probinsia.

Iti Mayo 12, eskortan ti polis ti Tagudin dagiti siklista agingga iti Vigan City.

Iti Mayo 13, sumublat dagiti polis ti Vigan City a mang-eskort kadagiti siklista iti panagdaliasatda manipud Vigan City agingga iti Sinait, Ilocos Sur sa iti panagsublida iti siudad.

Iti Mayo 14, eskortan met laeng dagiti polis ti Vigan City dagiti bumibisikleta manipud ditoy siudad agingga iti Tagudin a pangallawatan dagiti polis ti dayta nga ili.#