CANDON CITY – Kinuna ni Sen. Francisco Pangilinan nga iti daytoy a tiempo ti krisis, ti pannakaingato ti buis ti maudi koma nga ipakat ti nasional a gobierno.
Kinuna ni Pangilinan a lalo laeng a mabekkel dagiti agnguynguy-a a kompania ken dagiti agrigrigaten nga umili no maipatungpal ti plano ti gobierno a maipangato ti buis.
Kangrunaan a sangaili ti senador iti pannakalukat itay nabiit ti Tobacco Festival ditoy.
“Ti pannakakolekta iti husto a buis iti tinawen ti rumbeng ketdi a kitaen ti gobierno. Ammotayo a binilbilion ti mapukpukaw ti gobierno iti tinawen gapu iti saan a nasayaat a pannakakolekta iti buis,” innayon ni Pangilinan.
Kabayatanna, imbaskag ti senador ti planona nga agtaray kas bise presidente iti 2010 elections. Nagpatanganda kanon iti asawana a ni megastar Sharon Cuneta ti panagtarayna. Nupay kasta, kinunana nga agtalinaed nga independiente ken awan pay ti planona a kumappon iti aniaman a partido politikal.
“Nairugikon ti nagindependiente iti naudi a panagpipili ket narigat ti tumipon no ti pagtaktakderan ti maisakripisio,” innayon pay ni Pangilinan.
Kinuna ti senador a dakkel ti pammatina a tulonganto dagiti lokal nga opisial a natulonganna met iti kallabes.
Inannugot ni Pangilinan nga iti laksid a nangato ti ratingna, kasapulanna ti makatawen tapno makaestablisar iti grassroots machinery.
“No nangato ti ratingmo, basbassit siguro ti kasapulan a pondo. No addaka iti baba, siempre dakdakkel ti kasapulan,” kinuna pay ti senador.
Mainaig iti isyo ti automated election, kinuna ni Pangilinan a suportado iti daytoy ngem impaganetgetna a kasapulan latta ti panagbantay tapno masigurado a nadalus ti eleksion.
“Rumbeng laeng ti automation ta nadardaras ti bilangan ngem kasapulan ti panagbantay ta amangan no ma-fast track met ti panagkusit,” inyunay-unay ti senador.#