Sinaitenians ti Hawaii, California, kinondenarda panagraira ti prostitusion, kriminalidad iti ilida

SINAIT, Ilocos Sur – Uray dagiti tubo daytoy nga ili nga agindegen iti sabali a pagilian, impeksada ti panangkondenarda iti mapapati a panagraira iti prostitusion ken kriminalidad ditoy nga ili.

Maysa a manipesto a pinirmaan dagiti Sinaitenians iti Hawaii ken California iti Estados Unidos ti naipatulod iti opisina ti mayor ken iti sangguniang bayan ditoy a nangkondenaranda iti mapapati a panagraira dagiti videoke bars ken balay-pagraragsakan a mapapati a front ti prostitusion ken kriminalidad.

Nadakamat iti nasao a manipesto a kangrunaan a bugas ti sermon ti kura paroko ditoy nga ili iti pannakarambak ti Semana Santa a gapu iti kaadu dagiti videoke bars ken beerhouses, dagitoy ti mapapati ng ubbog ti prostitusion ken kriminalidad ditoy nga ili.

Kinuna pay ti manipesto a dagitoy ti mangdadael iti integridad dagiti babbai ken puon ti pannakarakrak dagiti pagtaengan.

Immun-una ngem daytoy, maysa a manipesto ti pinirmaan dagiti bumarangay, estudiante ken dadduma pay a grupo babaen ti initiatibo ti Simbaan ditoy nga indauluan ni Fr. Albert Rabe a nangkondenaranda iti operasion dagiti videoke bars a kuna ti Simbaan a puon ti panagraira ti prostitusion ken kriminalidad ditoy nga ili.

Manipud idi Enero, saanen a naikkan iti mayor’s permit dagiti videoke bars ken beerhouses ditoy bayat ti pannakaadalna no kasapulan a mapaserraanda gapu iti alegasion a parupada iti prostitusion ken ubbog ti krimininalidad.

Insingasing ti dagiti Sinaitenians nga agindegen iti dua nga estado iti Estados Unidos ti panangiwayat dagiti agtuturay ti executive-legislative action tapno mapukawen daytoy a problema.#