Footer

Suspetsa iti pannakapapatay ti CAFGU member, napilaan iti kaso

MAGSINGAL, Ilocos Sur – Naipilaan iti kaso a murder ti suspetsa iti pannakapapatay ti maysa a CAFGU member idi Pebrero 15 iti Barangay Maratudo ditoy.

Segun ken ni Police Chief Inspector William Gerona, hepe ti polis ditoy, impilada ti kaso a murder maikontra ken ni Juanito Vagay, 47, laborer, tubo ti Nagsupotan, San Juan ngem agnaeden iti Barangay Maratudo, bayat ti pannakabirbirokna.

Napaltogan ni Roderick Torda, 34, naasawaan, CAFGU member, ken nairaman a nasugatan ni Alex Almazan bayat ti kaaddada iti maysa pasken iti nasao a barangay, karaman ti suspetsa a ni Juanito Vagay,.

Segun iti inbestigasion, iti di pay ammo a gapu, inasitgan ti suspetsa ni Torda sana pinaltogan.

Natay a dagus ni Torda gapu kadagiti sugatna, nangruna iti barukong. Nagsagrap met ni Almazan iti sugat iti kanawan a patongna.

Naglibas ti suspetsa kalpasan ti pammaltog.

Nakarekobre dagiti uppat a kapsula manipud iti 9 mm a paltog iti nakapasamakan ti krimen.

Di pay ammo ti motibo ti pammapatay.#