Tattao, nagpiesta iti kinahon a naiburais a softdrinks

BANTAY, Ilocos Sur – Imbes a tumulongda, ginundawayan dagiti lumabas a tattao ti nagbagkat kadagitiĀ  kinahon a softdrinks a naiburais manipud iti maysa a ten-wheeler closed van iti national highway a sakup ti Barangay Guimod ditoy nga ili uray adda a siimatang ti drayber.

Kinuna ni Jose Velasco, residente iti Rosario, La Union, drayber ti 10-wheeler a closed van, a dida naparitan dagiti lumabas a tattao idi nagpidut ken nagbagkatda iti kinahon a softdrinks a naiburais iti kalsada.

Segun iti drayber, adu a traysikelan ti nagbagkat lattan iti kinahon a Pepsi. Mapapati nga adda pay naglugan iti van a nagbagkat lattan iti sumagmamano a cases ti Pepsi, inkargada iti luganda sada pimmanaw.

“Dimi met ida maparitan nga agbagkat,” kinuna ni Velasco.

Naammuan iti inbestigasion ti polis nga agpaamianan ti nasao a lugan tapno maideliber ti kargana a Pepsi iti Cabugao ngem idi addadan iti Barangay Guimod ditoy nga ili, maysa a motorista ti kellaat a rimmuar manipud iti maysa a gasolinaan ket iti panagpreno ti drayber ti 10-wheeler van, naglukat ti compartment ket naiburais dagiti kinahon a kargana.

Mapattpatta a nasurok a 300 a cases ti Pepsi ti nadadael ken nabagkat iti aksidente. Segun ken ni Velasco, nagkarga ti lugan iti 810 cases a Pepsi.

Sakbayna, sabali a 10-wheeler a truck ti nadadaelan iti makalkalsada nga approach ti maysa a rangtay iti Barangay Taleb ditoy nga ili a nakaigapuan iti panagsardeng ti trapiko itiĀ  lima nga oras.

Mapapati a natinnag ti diperensial ti nasao a truck iti one lane a makalkalsada nga approach ti rangtay ket iti pannakaistakna, awanen ti makalasat a lugan nga aggapu iti amianan ken abagatan manipud iti alas siete ti bigat iti Mayo 7.

Nakabiahe met laeng dagiti luglugan kalpasan a napaguyod ti truck sa naipaigid iti dalan.#