Footer

Telenovela ti politika iti San Ildefonso: Politically motivated ti offerda – Atty. Mark Purisima

SAN ILDEFONSO, Ilocos Sur- Agkabsat ti agsango a para mayor ditoy nga ili iti 2010 elections.

Tumaray a para mayor ni Atty. Mark Purisima, kasangona ni agdama a Vice Mayor Tito Purisima. Impilan ni Mark ti kandidaturana para chief executive ti ili ditoy

Agkandidato para bokal ti umuna a distrito ni agdama a Mayor Christian Purisima, sukat ti inana a ni Bokala Azucena “Chuchi” Purisima nga agturposen agsipud ta maikatlon a terminona.

Idi 2007, nagsango da Christian ken Mark iti kinamayor ditoy nga ili ngem nangabak ti immuna.

Iti pannakipatangna kadagiti reporters ti DWRS a naipatangatang iti Barangay Commando-Brigada a programa ni Jun Ramos, impalgak ni Mark Purisima nga adda offer dagiti kakabsatna a no awatenna ti kinamayor, agpababa ni Tito a kas bise mayor.

Kinuna ni Mark a dina inawat ti naitanggaya kenkuana ta adda kondisionna.

“Narigat para kaniak nga akseptaren dayta nga offerda ta saanko met a maibati dagiti supportersko a nangtultulong ken nangsuporta kaniak idi maymaysaak a nagkandidato idi 2007,” kinuna ni Purisima

Segun ken ni Mark Purisima, no awatenna ti offerda, agpababa a bise mayor ni Tito, ngem isuda ti agpili iti konsehal ket kapilitan nga agsanud dagiti para konsehalna,

“Unacceptable para kaniak gapu ta diak kayat a maibati wenno maabandona dagiti kaduak a loyal kaniak idi 2007,” kinuna ni Mark.

Kinuna ni Mark nga uray isunto ti mayor ket ti kabsatna ti bise, no isuda ti agpili kadagiti konsehal, saanna a mayimplementar dagiti planona para iti ilida.

Idi masaludsod kenkuana no ania ti reaksion ni Bokala Chuchi mainaig iti saanda a panagkaykaysa iti politika, kinuna ni Mark a mailiwen iti inana nga imbilangna a “Miss Universe” iti biagna agsipud ta tallon a tawen a dina nakita ngem ammona a maawatan dagiti nagannak kenkuana.

Kinuna ni Mark a saan pay a mangasawa ta addanto latta a mangaywan kadagiti nagannak kadakuada no baket ken lakaydan.

Kinuna ni Mark nga idi nalpas ti eleksion idi 2007, di immas-asideg kenkuana dagiti kakabsatna para iti rekonsiliasion no di ita laeng a masungad manen ti eleksion,

“Para kaniak, politically motivated ti offerda a rekonsiliasion,” kinuna ni Mark.

Kinuna ni Mark a nabayag a tiempo a saan a naikkan dagiti tattao iti gundawayda a mangpili dagiti konsehalda sana innayon nga ita, adda tiansa dagiti tattao a makapadas iti hushusto nga eleksion, adda tiansada a mangpili dagiti sangguniang bayan members a namnamaenda a makapagserbi iti ilida.#