Tobacco tripartite conference, maangay iti Ilocos Sur

VIGAN CITY – Ditoy probinsia ti pakaangayan ti tripartite conference dagiti agmulmula ti tabako ken traders ken manufacturers.

Kinuna ni Gov. Deogracias Victor “DV” Savellano bayat ti programana a KABSAT DV on TV nga imbes a dagiti mannalon ti agbiahe iti Manila, dagiti laengen pannakabagi dagiti tobacco traders ken cigarette manufacturers ti dumanon ditoy probinsia tapno mapagpapatangan no mano ti maipatong iti agdama a floor price ti tabako.

Iti naangay a Pre-Consultative Conference on the Proposed Tobacco Floor Prices a naangay iti kapitolio idi Agosto 26 a timmabunuan dagiti mannalon ditoy probinsia, napagtitinonganda nga idatagda iti tripartite conference ti P31.20 a maituon iti floor price ti tabako tunggal kilo.

Kas maibatay iti production cost a nanayonan iti 25% mark-up nga umabot iti P127,236 ti paglakuan iti tunggal ektaria, dawaten dagiti mannalon dagiti sumaganad a presio: AA – 92.20;A – 90.20; B – 88.20; C – 86.20; D – 81.20;E-80.20; F1 – 76.20; F2 – 74.20 ken reject – 54.20..

Idi kanikadua a tawen, naisayangkat ti Tobacco Summit ditoy probinsia babaen ti initiatibo ni Savellano tapno maipaayan iti atension dagiti problema dagiti agmulmula iti tabako kangrunaanna unay ti nababa a presio ti tabakoda.

Iti panagbisita ni Savellano iti China, naduktalanna a P200 kada kilo ti presio ti tabako sadiay.

Uray ni Dip. Eric Singson, imbagana a kasta met ti presio ti tabako iti Malaysia.

Iti naangay a tripartite conference kalpasan ti tobacco summit, inanamongan dagiti traders ken manufacturers a matuonan iti P10 ti ceiling price ti tabako.

Iti napalabas a tobacco season, immabut ti presio ti tabako iti nasurok a P90 kada kilo iti Class A ken P50 kada kilo iti reject.

Iti masungad a panagtatabako, manamnama nga umadu manen ti bilang dagiti agmula iti tabako gapu iti napintas a presio ti produktoda itay napan a tawen.

Kabayatanna, impanamnama ni NTA Administrator Carlitos Encarnacion a sakbay nga aggibus ti tawen, addanton baro a sanga ti opisinada bayat ti groundbreaking ceremony a naangay iti lote nga indonar ti gobierno probinsial a pakaipatakderan ti baro a pasdek idi Setiembre 8.

Immatendar iti seremonia da Gob. DV Savellano ken Bise Gob. Jerry Singson ken dagiti opisial ti NTA manipud iti central office.

Kinuna ni Savellano nga iti pannakaipatakder ti pasdek ti NTA, ad-adunton nga agmulmula iti tabako iti umuna a distrito ti Ilocos Sur ti matulongan ti ahensia.

Innayon ti gobernador a madadaan ti gobierno probinsial a mangidonar iti nalawlawa pay a lote no agdesision ti NTA a mangiyakar iti central office ti ahensia ditoy probinsia.

“Yantangay adda ditoy dagiti mannalon, nasayaat unay no adda met ditoy ti NTA tapno saandan a marigatan ken magastuan no adda idariragda a parikut mainaig iti mulada a tabako,” kinuna ni Savellano.

Kiniddaw ketdi ni Encarnacion a ti koma laengen lote a pakaipatakderan ti Tobacco Pulp Processing Plant ti idonar ti gobierno probinsial.

Segun ken ni Encarnacion, no maipasdek ti planta, daytoyto ti mangproseso iti kayo ti tabako tapno agbalin a papel.

Imbes a maibelleng dagiti pinuon ti tabako kalpasan ti panagaapit, agbalin daytoy a kanayonan a pamastrekan dagiti mannalon, kinuna ni Encarnacion#