Footer

Tour of Ilocos Sur, maisagsaganan

VIGAN CITY – Maisagsaganan ti sabali manen a Tour of Ilocos Sur  a maangay inton Abril  29-May 3,2009.

Kinuna ni Bokal Jose Bunoan a babaen ti nasao a pasalip iti bisikleta, saan laeng a maitampok dagiti nadumaduma a lugar iti probinsia no di pay masanay dagiti local cyclist para iti pannakisalipda kadagiti sabali a torneo ti bisikleta iti pagilian.

“Maysa daytoy kadagiti kayatmi a mataginayon tapno maitampok ti probinsia ken masanay ken maisagana dagiti bumibisikleta ti probinsia a sumalip kadagiti sabsabali a torneo iti Filipinas,” kinuna ni Bunoan.

Kinuna ti bokal a naipakaammonan daytoy kada Gobernador Deogracias Victor Savellano, Deputy Speaker Eric Singson ken Congressman Ronald Singson ken kiniddawna ti suportada para iti daytoy a torneo.

Ti sumaganad ti rota ti torneo: umuna nga aldaw –  time trial manipud Vigan City agingga iti Sinait; maikadua nga aldaw- Sinait agingga iti Tagudin; maikatlo nga aldaw  –  Tagudin agingga iti Cervantes; maikapat nga aldaw – Cervantes agingga iti  Candon City; maudi nga aldaw (dua nga stage) – Candon agingga iti San Emilio ken San Emilio agingga iti Vigan City.

Kinuna ni Bunoan a mangaramidda iti emerhensia a plano tapno di maulit  ti napasamak iti torneo idi napan a tawen nga adda naaksidente a siklista.

“Saan a maliklikan ti aksidente  ngem masapul ti madagdagus a panagresponde tapno maitaray ti nadunor iti ospital ken insigida a maagasan,” kinuna ti bokal.

Eksklusibo a taga-Ilocos Sur dagiti agsasalip iti Tour Of Ilocos Sur, segun iti bokal.#