INTRAMUROS, Manila – Naitandudo dagiti agduduma a produkto, tourist spots ken kultura ken kannawidan iti Region I iti naangay a Regional Travel Mart iti Clamshell ditoy a siudad itay nabiit.
Iti pannakaangay ti Ilocos Sur Day idi Abril 25, impabuya dagiti taga-Ilocos Sur dagiti kannawidan a salsala ken kankanta kasta metten ti maysa a parang ti sarsuela kas paset ti impabuyada a cultural presentation.
Iti panagsarita ni Gov. Deogracias Victor “DV” Savellano, pinagyamananna ti kinaaktibo ni Department of Tourism Regional Director Martin Valera para iti promosion ti Rehion I iti world tourism.
Inyawis ti gobernador ti ibibisita dagiti turista iti rehion ken iti Ilocos Sur.
Sinaludaran met ni Valera ti suporta dagiti probinsia iti daytoy a programa ti DOT.
“Rumbeng laeng a maikkan iti komendasion dagiti opisial gapu iti addangda a mamagbalin iti Rehion I a sentro ti turismo,” kinuna ni Valera.
Kabayatanna, impeksa ni Ilocos Norte Gov. Michael Keon ti ragsakna iti panagballigi ti fashion show nga impabuyada bayat ti Ilocos Norte Day a naangay met laeng iti Intramuros, Manila.
Mismo a dagiti lokal nga opisial a pakaibilangan dagiti mamayor ken provincial board members ti nagrampa bayat ti fashion show a nakaitampokan ti inabel a produkto ti probinsia.
Maysa ti regional travel mart a wagas a panangitandudo ti DOT ken dagiti uppat a probinsia kadagiti luglugar a mabalin a pasiaren dagiti turista kas kadagiti kabaybayan, bambantay, simbaan ken agduduma a produkto a mamagbalin ti Rehion I kas ultimate tourism destination iti pagilian.
Nangrugi ti travel mart idi Abril 15 ket nagpatingga itay Mayo 3.#