BANAYOYO, Ilocos Sur – Saan a nakalusot ti maysa a trak a nagkarga kadagiti naputed a troso kalpasan a sinaed dagiti polis sadiay Barangay Naguimba ditoy nga ili idi rabii ti Enero 29.
Nagturong dagiti polis iti nadakamat a lugar kalpasan a nakaawatda iti impormasion a maysa a maroon Isuzu truck a nagkarga iti naputed a troso ti lumabas iti Sitio Bayasan, Barangay Naguimba.
Nangipasdek dagiti polis iti checkpoint iti nadakamat a barangay ket pinarada ti simmungad nga Isuzu truck a minaneho ni Jomer Tacuban y Gao-at, 24, naasawaan, ken residente iti Barangay Casilagan Norte.
Maysa nga agnagan Julius Garnace y Gandalera, 21, baro, ken residente iti Barangay Lintic ditoy met laeng nga ili, ti nangkuyog iti lugan a nakasakay iti motorsiklo nga awan ti plakana.
Iti panagsukimat dagiti polis iti uneg ti Isuzu truck, nasukalanda dagiti naputputed a sagat (molave) iti nadumaduma a kaatiddog.
Awan ti naipakita dagiti dua a dokumento para iti pannakaibiahe dagiti karga ti truck.
Naipan ti lugan ken dagiti dua iti police station para iti umisu a dokumentasion ken disposision.#