VIGAN CITY – Saan nga A H1N1 ti kangrunaan a nagproblemaan dagiti agbasbasa iti panagsublida iti pagadalan itay Hunio 1 no di ti pannakabasada.
Nepnep ti simmabat kadagiti agbasbasa iti umuna a lawas ti klase ditoy probinsia ken iti Rehion Uno ken iti Cordillera Administrative Region a pakairamanan ti siudad ti Baguio.
Kanaig daytoy, nagsasaruno dagiti text messages kadagiti nadumaduma a radio stations ditoy a nagsaludsod no adda klase wenno awan gapuen iti pagulpegulpe a bayakabak a sarunuen ti napigsa a gurruod ken kimat.
Ngem awan ti pammilin manipud kadagiti agtuturay dagiti tallo a dibision ti Department of Education iti probinsia a masuspende ti klase.
Segun iti PAGASA ditoy probinsia, nupay adda maysa a low pressure area iti adayo a paset ti akin-amianan a Luzon, ginuyodna ti southwest monsoon a nangisangbay iti napigsa a tudtudo.
Nupay kasta, kinuna ni weather forecaster Agustin a saan nga agdinakkel ti danum iti kabaybayan agsipud ta agsardesardeng ti tudo.
Ngem imballakad ti weather forecaster a saan pay a tumapog dagiti mangngalap gapu iti nadawel ti kabaybayan.
Kinuna ni Agustin a sagrapen ti probinsia ti kastoy a tiempo iti sumagmamano nga aldaw.
Kabayatanna, nasuspende ti klase iti Baguio City ken iti probinsia ti Benguet gapu iti napigsa a bayakabak itay Hunio 5.
Iti pammilin ni Mayor Reinaldo Bautista Jr., suspendido ti klase iti pagadalan iti elementaria ken sekundaria laeng. Ngem iti pammilin ni Gov. Nestor Fongwan, suspendido amin a a level ti pagadalan iti probinsia ti Benguet iti daytoy nga aldaw.#