BANNER NEWS: Unibersidad, kinanselana ti klase gapu iti A(H1N1)

VIGAN CITY – Nagtignay ti presidente ti maysa nga unibersidad ditoy siudad tapno malapdan ti panagwaras ti A(H1N1) kalpasan a natakuatan a lima nga estudiante iti pagadalan ti nagpositibo iti nasao a sakit.

Imbilin ni Dr. Lauro Tacbas, Presidente ti University of Northern Philippines, ti pannakasuspende ti klase manipud iti Agosto 13 agingga iti Agosto 18 tapno maiwayat dagiti preventive health measures tapno malapdan ti panagwaras ti A(H1N1) iti pagadalan.

Kinuna ni Tacbas a maiwayat ti panagdalus ken panag-fumigate kadagiti amin a kuarto ken iti aglawlaw ti UNP bayat ti kaawan ti klase.

Segun ken ni Tacbas, maymaysa ti nangrugian dagiti lima a kaso, manipud iti Manabo, Abra a nakaduktalan iti maysa nga estudiante a nagpositibo iti A(H1N1) ngem mapapati a naimbaganen isu a pinalubosan dagiti nagannak kenkuana a mapan agbasa iti UNP ngem nakaakaran dagiti kadormitorioanna a nakakitaan iti sintomas iti nasao a virus.

Kinuna ti presidente a pinaitulodna dagiti estudiante babaen ti lugan ti pagadalan tapno ag-self-quarantineda iti pagtaenganda bayat ti panagpaimbagda.

“Outside of that, adda pay ibagbagada a dadduma (kaso) ngem saanda a kumpirmado no di laeng dagiti lima a cases,” kinuna ni Tacbas.

Ti UNP ti maikadua a pagadalan ditoy probinsia a nangsuspende iti klasena gapu iti A(H1N1) virus.

Idi Hulio 17 ken 20, sinuspende ti St. Joseph Institute ti Candon City ti klase kalpasan a sumagmamano nga estudiante ditoy ti nakakitaan iti sintomas ti nasao a sakit.

Impatalged ni Tacbas kadagiti nagannak ti nainget a panagmonitorda kadagiti estudiante inton agsublida iti pagadalan tapno saan nga agwaras ti A(H1N1).

Indagadag ni Tacbas kadagiti nagannak a no adda aggurigor nga anakda, saanda koman nga ibaon dagitoy a mapan agbasa tapno dida akaran dagiti padada nga estudiante.#