Unification fight, sumaruno a puntiria ni Viloria

VIGAN CITY – Ad-adda a prioridad ti kampo ni International Boxing Federation Light Flyweight Champion Brian Viloria ti pannakisangona ken ni agdama a World Boxing Organization Light Flyweight champion Ivan Calderon para iti maysa a unification match ngem ti panangawatna iti karit ni Ulysses Solis a rematch.

Iyaw-awat ni Vigan City Mayor Eva Marie Singson Medina ti symbolic key ti siudad ken ni IBF Light Flyweight Champion Brian Viloria idi nag-courtesy call ti kampeon iti opisina ti mayora idi Abril 21. Naagaw ni Viloria ti korona ni Ulysses Solis idi dinalebna daytoy iti maika-11 a round iti panagboksingda iti Araneta Coliseum idi Abril 19 a binuya dagiti rinibribu nga apisionado iti boksing. (Teksto:Mancielito S. Tacadena/ladawan:Floyd Pajas)
Iyaw-awat ni Vigan City Mayor Eva Marie Singson Medina ti symbolic key ti siudad ken ni IBF Light Flyweight Champion Brian Viloria idi nag-courtesy call ti kampeon iti opisina ti mayora idi Abril 21. Naagaw ni Viloria ti korona ni Ulysses Solis idi dinalebna daytoy iti maika-11 a round iti panagboksingda iti Araneta Coliseum idi Abril 19 a binuya dagiti rinibribu nga apisionado iti boksing. (Teksto:Mancielito S. Tacadena/ladawan:Floyd Pajas)

Daytoy ti impalgak a mismo ni Viloria iti naangay a press conference iti Baluarte bayat ti ibibisitana itoy a siudad idi Abril 21.

Sakbayna, nag-courtesy call ni Viloria iti city hall ket inyawat kenkuana ni Mayor Eva Marie S. Medina ti symbolic key ti siudad kas panangpadayaw kenkuana nga adopted son ti Vigan City.

“Saan a makatulong iti panagpangato ti boxing careerko no patolak ti karit ni Solis a rematch,” kinuna ni Viloria.

Inagaw ni Viloria ti IBF Light Flyweight crown ken ni Solis babaen ti panangdalebna daytoy iti maika-11 a round iti labanda iti Araneta Coliseum idi Abril 19.

Iti main event, pinadso ni Nonito Donaire ti Amerikano a kinaboksingna iti maikapat a rikus iti panangdepensana iti koronana iti Flyweight division iti International Boxing Federation/International Boxing Organization.

Inannugot ti baro nga IBF champion a simmiploten iti panunotna ti panagretirona a boksingero kalpasan ti dua a nagsaruno a pannakaabak ken maysa a draw a nangibaba iti careerna tallo a tawenen ti napalabas.

Kinunana a no dina naigasatan ti labanda ken ni Solis, mabalin a daydiay koman ti maudi a pannakirupakna iti ring.

Kinuna ni Viloria a talaga a sinaganaanna ti nasao a laban babaen ti tallo ket gudua a bulan nga intensive training isu a mas nakakondision ti bagina ken nasidsidap ti panunotna nga immuli iti ring.

Impalgak ni Viloria nga awan plano ti kampoda a patumbaenna ni Solis no di ket napagtutulaganda ti panangibbusna iti pasensia daytoy tapno marurod ken madadael ti konsentrasionna.

“Nasamsam-it daytoy a panangabakko ta naibangonko toy bagik,” kinuna pay ni Viloria.

Kadua ti kampeon ti kaayan-ayatna a ni Erica Navarro, tubo iti Cabugao iti ibibisitana ditoy probinsia.

Agtalinaed ni Viloria iti sumagmamano nga aldaw iti Ilocos Sur tapno ibingayna ti padasna kas boksingero kadagiti agtutubo nga agduyos iti sports ken madama a sansanayen ti Viloria Boxing Club a naipanagan kenkuana ken tartarawidwidan dagiti kakabagian ti kampeon a mabirbirngasan iti Hawaiian Punch.#