Validation iti COMELEC, kasapulan

VIGAN CITY – Masapul ti ipapan dagiti siguden a botante iti opisina ti Commission no Elections iti ilida tapno ma-validate ti naganda iti listaan, daytoy ti indagadag ti Candon City election officer bayat ti maysa a miting kadagiti mayors iti Ilocos Sur idi Hulio 31.

Kinuna ni Atty. Fidel Gines II, nangibagi iti Comelec, a tapno ma-validate ti maysa a botante, kasapulan a maala ti biometrics daytoy kas iti ladawan, fingerprints ken pirmana para iti pannakaited iti identification cardna.

Nupay kasta, kinuna ni Gines a saan a makansela ti rehistrasion ti botante a saan a ma-validate ti rehistrasionna ngem awanto ti maawat daytoy nga ID idinto nga innayonna a makabutos dagiti amin nga umili a nakapagbutos idi 2007.

Kinuna ni Gines a kasapulan a mapan iti opisinada dagiti saan a nagbutos iti naminduan a nagsaganad nga eleksion tapno mareactivate ti naganda kas botante. Agpatingga inton Oktubre 31 ti panagrehistro iti COMELEC.

Impakaammo pay ni Gines a Nobiembre 30 ti maudi nga aldaw a panangipila iti certificate of candidacy dagiti agpaidasig iti eleksion inton umay a tawen.

Kinunana a naisapsapa daytoy tapno maiyimprenta ti National Printing Office dagiti balota a kasapulan iti full automated election. Maikkan iti 90 nga aldaw nga agkampania dagiti tumaray iti national positions idinto a 45 nga aldaw para kadagiti agngayangay iti local a pagsaadan.

Kabayatanna, dinawat met ni Kabataan Rep. Raymund “Mong” Palatino kadagiti mayors iti Ilocos Sur nga awisenda dagiti agtutubo a mapan agparehistro.

Kinuna ti party list representative a masapul pay a maisayangkat ti voters education kadagiti agtutubo tapno mapilida dagiti kandidato a rumbeng nga agserbi iti pagilian.

Kas maibasar iti listaan ti poll body itay napan a bulan ti Mayo, aganay pay laeng a % ti pakabuklan dagiti potential new voters ti nakapalista iti Comelec.#