Zero malnutrision kadagiti agbasbasa nga ubbing, puntiria ti Vigan City government

VIGAN CITY – Puntiria ti gobierno ti siudad ti zero a malnutrision kadagiti ubbing ditoy, segun ken ni Mayor Eva Marie S. Medina.

Iyim-implementar ti gobierno ti siudad ti Vigan dagiti long-term a programa ti nutrision para iti pannakagun-odmi iti zero malnutrision nga insidente kadagiti ubbing ditoy,” kinuna ti mayora.

Segun ken ni Medina, karaman kadagiti long-term a programa ti nutrision ti siudad ti supplemental feeding dagiti malnourished nga ubbing, pannakasanay dagiti mangisursuro iti agrikultura para iti bio-intensive gardening, napingpinget nga impormasion ken kampania ti edukasion maipanggep iti kinapateg ti nutrision ken nasalun-at a panagbiag, ken regular nga ebaluasion iti kasasaad ti nutrision dagiti ubbing nga agbasbasa iti day care ken elementaria ken dagiti adda iti sekundaria.

Innayon ni Medina a malaksid ti pannakapapigsa dagiti barangay nutrition council, maisayangkat pay dagiti panagklase dagiti nagannak a babai maipanggep iti nasalun-at a panagbiag, pannakaisayangkat dagiti educational field trips ken pannakaituloy ti gannuat a K2 wenno pannakapukaw ti kuto dagiti ubbing.

Kabayatanna, kas paset ti panangselebrar ti siudad iti National Nutrition Month itay Hulio 24, nagsasalip dagiti agbasbasa ditoy siudad iti nutrition quiz, poster slogan, mural painting, oration, cheer dance, speech choir, cooking, ken draw-and-tell contest a naangay iti City hall ditoy ken iti Vigan Culture and Trade Center .

Naangay pay ti maysa a symposium maipanggep iti nasalun-at a panagbiag.

Naiyawat dagiti premio kadagiti nangabak iti malem dayta nga aldaw.

Ti tema ita a tawen: “Wastong Nutrisyon Kailangan, Lifestyle Diseases Iwasan”.#